Qetësohet situata nga vërshimet në Fushë Kosovë, banorët presin kompensimin e dëmeve

Kosovë – Situata në Komunën e Fushës Kosovës nga reshjet e shiut dhe borës është qetësuar, mirëpo pasojat dhe dëmet e shkaktuara janë të mëdha, njofton Telegrafi Kosovë

Ekipi i Telegrafit sot i ka vizituar disa zona ku ka pasur vërshime nga reshjet e shiut në këtë komunë, si dhe ka biseduar me disa nga banorët të cilët në kushte anonimiteti kërkuan që dëmet e shkaktuara të ju kompensohen nga Komuna e Fushë Kosovës.

Në lidhje me këtë zëdhënësi i Komunës së Fushë Kosovës, Ali Topalli në një intervistë dhënë për Telegrafin ka thënë se në kuadër të Shtabit Emergjent i kanë edhe pesë Komisione Vlerësuese të cilat kanë dal në terren për vlerësimin e dëmeve të shkaktuara nga vërshimet.

Ai tregoi se ende nuk ka një raport përfundimtarë vlerësues se sa mund të jenë pasojat dhe dëmet e shkaktuara.“Nuk kemi një raport të detajuar pasi kjo është në proces, presim në çdo moment deri sa të qetësohet gjendja të arrijmë në një raport përfundimtarë”, ka thënë ai.

Sipas tij, Qeveria e Kosovës i ka premtuar Komunës së Fushë Kosovës se do t’i ndihmoj që të ua kompensojnë dëmet e shkaktuara qytetarëve të kësaj komune.

“E kemi një sinjal të mirë nga Qeveria e Kosovës, të cilët na kanë premtuar së paku ndihmë që do të jenë pranë nesh dhe mundësitë buxhetore sigurisht që janë të limituara që urgjentisht të intervenohet, pasi ende buxheti është i mbyllur. Vlerësimi do të bëhet si dhe kompensimet do të bëhen”, ka thënë zëdhënësi i Fushë Kosovës./ora24.tv/